main ne logon ko na logon ne mujhe dekha tha
sirf us raat andheron ne mujhe dekha tha
puchhta phirta hun main apna pata jangal se
aaKHiri bar daraKHton ne mujhe dekha tha
yunhi in aankhon mein rahti nahin surat meri
aaKHir us shaKHs ke KHwabon ne mujhe dekha tha
is liye kuchh bhi saliqe se nahin kar pata
ghar mein bikhri hui chizon ne mujhe dekha tha
Dubte waqt bachane nahin aae lekin
yahi kafi hai ki apnon ne mujhe dekha tha
Ghazal
Maine logon ko na logon ne mujhe dekha tha
Abid Malik