Maine irada jab bhi kiya hai uDan ka

main ne irada jab bhi kiya hai uDan ka
us ko KHayal aaya hai tir-o-kaman ka

aae KHayal apni zamin ka bhi kuchh unhen
rakhte hain dard dil mein jo sare jahan ka

phir shahr-e-dostan ki taraf gamzan hun main
go jaanta hun shahr mein KHatra hai jaan ka

hum ko zamin se KHub-tar aaya na kuchh nazar
chakkar laga ke dekh chuke aasman ka

az-KHud hi KHwahishen meri mahdud ho gain
aaya KHayal jab mujhe apne makan ka