main nahin rota hun ab ye aankh roti hai mujhe
roti hai aur sar se panw tak bhigoti hai mujhe
bad-dua hai jaane kis ki yaad ki jo har ghaDi
har guzishta lamhe se wahshat si hoti hai mujhe
mumkina had tak main apni dastaras mein hun magar
pichhle kuchh din se koi shai mujh mein khoti hai mujhe
mutmain tha din ke bikhraw se main lekin ye raat
dana-dana phir ajab Dhab se piroti hai mujhe
main bahut mashshaq ek tairak tha lekin wo aankh
dekh ab ma-kashti-e-jaan ke Duboti hai mujhe
Ghazal
Main nahin rota hun ab ye aankh roti hai mujhe
Shahram Sarmadi