main aandhi mein reza reza ek phul chun raha hun
Dara Dara sa hawa ki sanson ko sun raha hun
wo donon to rabt-e-bahami se juDe hue the
main kyun raqabat ke is jahannam mein bhun raha hun
paDosiyon ke tamam mafruze sach hue hain
main be-samar sochun ki zehanat ko dhun raha hun
kohar mein gum-sum samaato tum gawah rahna
main ek diwar-e-girya har raat chun raha hun
mil aise mujh se guman ho la-talluqi ka
main dosti ke liye bahut bad-shagun raha hun
Ghazal
Main aandhi mein reza reza ek phul chun raha hun
Musavvir Sabzwari