Mahak raha hai badan sara kaisi KHushbu hai

mahak raha hai badan sara kaisi KHushbu hai
ye tere lams ki tasir hai ki jadu hai

tumhaara narm-o-subuk hath chhu gaya tha kabhi
ye kaisi aag hai sozan har ek pahlu hai

hai kis qadar mutawazin nigah-o-dil ka milap
ki jaise donon taraf ek san taraazu hai

rawan-dawan hai judai ka karb ye kaisa
wo mutmain na mujhe apne dil pe qabu hai

zamana kahta hai jis ko hasin taj-mahal
wafa ki aankh se Tapka hua ek aansu hai

bahut hasin hai mahaul-e-zindagi 'sadiq'
nazar ke samne jab se wo aaina-ru hai