manus fitratan hain gham-e-ashiqi se hum
phir kyun na tere naz uThaen KHushi se hum
jab se yaqin hua hai wahi karsaz hain
ab apna haal kahte nahin har kisi se hum
KHamosh zindagi bhi dalil-e-bahaar hai
ye dars le rahe hain chaman mein kali se hum
ye aur baat hai ki hamein kuchh gila bhi hai
munkir nahin magar teri dariya-dili se hum
dil-soz-o-dil-KHarash hai ye jada-e-hayat
lekin guzar rahe hain baDi sadgi se hum
ye fikr ye KHayal 'aziz' aap ka na ho
kuchh sher sun rahe the abhi 'warsi' se hum
Ghazal
Manus fitratan hain gham-e-ashiqi se hum
Aziz Warsi