mahtab-e-wajud paDhte hain
aa kitab-e-wajud paDhte hain
dhup rangon mein Dhaal dete hain
aaftab-e-wajud paDhte hain
teri KHushbu ko sans karte hain
phir gulab-e-wajud paDhte hain
ek mahak jo badan jalati hai
us ka bab-e-wajud paDhte hain
kitni bojhal guzarti hain shamen
tera KHwab-e-wajud paDhte hain
teri hairani jaan len pahle
phir sarab-e-wajud paDhte hain
koi andar ki baat karte hain
iztirab-e-wajud paDhte hain
Ghazal
Mahtab-e-wajud paDhte hain
Naheed Virk