Lun wam baKHt-e-KHufta se yak-KHwab-e-KHush wale

lun wam baKHt-e-KHufta se yak-KHwab-e-KHush wale
'ghaalib' ye KHauf hai ki kahan se ada karun

KHush wahshate ki arz-e-junun-e-fana karun
jun gard-e-rah jama-e-hasti qaba karun

aa ai bahaar-e-naz ki tere KHiram se
dastar gird-e-shaKH-e-gul-e-naqsh-e-pa karun

KHush uftadgi ki ba-sahra-e-intizar
jun jada gard-e-rah se nigah surma-sa karun

sabr aur ye ada ki dil aawe asir-e-chaak
dard aur ye kamin ki rah-e-nala wa karun

wo be-dimagh-e-minnat-e-iqbaal hun ki main
wahshat ba-dagh-e-saya-e-baal-e-huma karun

wo iltimas-e-lazzat-e-be-dad hun ki main
tegh-e-sitam ko pusht-e-KHam-e-iltija karun

wo raaz-e-nala hun ki ba-sharh-e-nigah-e-ajz
afshan ghubar-e-surma se fard-e-sada karun