log kahte the wo mausam hi nahin aane ka
ab ke dekha to naya rang hai virane ka
banne lagti hai jahan sher ki surat koi
KHauf rahta hai wahin baat bigaD jaane ka
hum ko aawargi kis dasht mein lai hai ki ab
koi imkan hi nahin lauT ke ghar jaane ka
dil ke patjhaD mein to shamil nahin zardi ruKH ki
rang achchha nahin is bagh ke murjhane ka
kha gai KHun ki pyasi wo zamin hum ko hi
shauq tha kucha-e-qatil ki hawa khane ka
Ghazal
Log kahte the wo mausam hi nahin aane ka
Ahmad Mahfuz