Likha hai go teri qismat mein shaukat chashm-e-tar rakhna

likha hai go teri qismat mein 'shaukat' chashm-e-tar rakhna
magar zalim kisi ki aabru par bhi nazar rakhna

na bhulega na bhulega qayamat tak na bhulega
kisi ka wo mohabbat se mere sine pe sar rakhna

na uTThega dil-e-nazuk se sadma ranj-e-furqat ka
ilahi mere dard-e-dil se un ko be-KHabar rakhna

wo kya jaane bhala hoti hain kaisi aish ki raaten
mayassar ho na jis ko ta-sahar takiye pe sar rakhna

dil-e-be-arzu kafi hai hum hasrat-nasibon ko
mubarak ho sadaf ko apni muTThi mein guhar rakhna

na ho kis tarah shart-e-dilbari duniya mein dildari
jahan mein ghar banana sahl hai mushkil hai ghar rakhna