Libas-e-yar ko main para-para kya karta

libas-e-yar ko main para-para kya karta
qaba-e-gul se use istiara kya karta

bahaar-e-gul mein hain dariya ke josh ki lahren
bhala main kashti-e-mai se kinara kya karta

naqab ulaT ke jo munh aashiqon ko dikhlate
tumhin kaho ki tumhaara nazara kya karta

suna jo haal-e-dil-e-zar yar ne to kaha
tabib marte hue kahe chaara kiya karta

hilal-e-id ka har-chand ho jahan mushtaq
tumhaari abruon ka sa ishaara kya karta

haqiqat-e-dahan-e-yar kholta kyun-kar
nahufta raaz ko main aashkara kya karta

qadam ko pichhe rah-e-KHaufnak-e-ishq mein rakh
ye pahle dekh le dil hai ishaara kya karta

KHum-e-sharab se mujh mast ne na munh phera
kanar-e-ab se pyasa kinara kya karta

bahaar thi jo wo gul-chehra yar bhi hota
akele ja ke chaman ka nazara kya karta

gudaz mom se har ustuKHan ko pata hun
phir aur sozish-e-dil ka harara kya karta

baDa hi KHwar ilaqa hai gulshan-e-ulfat
meri tarah koi is mein ijara kya karta

sharab-e-KHuld ki KHatir dahan hai rakhta saf
wazu mein warna ye zahid gharara kya karta

shikasta-dil na ho us but ke naz se kyun-kar
suluk shisha se hai sang-e-KHara kya karta

bahaar-e-gul mein piyala laga liya munh se
sharab pine ko main istiKHara kya karta

faqir ko nahin darkar shan amiron ki
sar-e-barahna sar-e-goshwara kya karta

bahaar-e-gul mein tha jame se bahar ai 'atish'
na karta main jo gareban ko para kya karta