Lahu pukar ke chup hai zamin bolti hai

lahu pukar ke chup hai zamin bolti hai
main jhumta hun ki ye kaenat Dolti hai

abhi zamin pe utregi us dariche se
wo raushni jo musafir ki rah kholti hai

maza to ye hai ki wo zahr mein bujhi aawaz
kabhi kabhi mere kanon mein shahd gholti hai

ajib rabt hai gungi rafaqaton se mujhe
wo sochta hai to meri zaban bolti hai

talash mein hun tawazun kahin nahin milta
har ek chehra ko meri nigah taulti hai

jo be-uDan hain 'alam' wo kis shumar mein hain
hawa bhi uDte parinde ke par TaTolti hai