Lahu mein Duba hua mila hai wafa ka har ek usul tujhko

lahu mein Duba hua mila hai wafa ka har ek usul tujh ko
main jaanta hun pasand kyun hain gulab ke surKH phul tujh ko

gawah ban kar bata rahi hain ye surKHiyan teri ungliyon ki
sameTne paD rahe hain KHunKHar jangalon ke babul tujh ko

thaki ana ka safar kahan tak kahin to ruk ja kahin to dam le
bana diya hai masafaton ne tere qadam ki hi dhul tujh ko

ye reza reza si aarzuen kabhi to kar de mere hawale
main apne bikhre badan ki manind dekhta hun malul tujh ko

ufuq ke us par bhi munasib nahin hai aadarsh ka taaqub
kahin tujhe be-watan na kar de tera ye shauq-e-fuzul tujh ko

wo KHat raqibon ke hath aaya likha tha jo mere nam tu ne
kahan kahan kar chuki hai ruswa teri ye chhoTi si bhul tujh ko

tujhi ko nafrat rahi hai jin se wo jin ki tabir sirf tu hai
wo aaKHir-e-shab ke KHwab karne paDenge aaKHir qubul tujh ko

'qatil' kitne hi lafz apni asas ka zaiqa badal len
agar bata dun kabhi main apni ghazal ki shan-e-nuzul tujh ko