lagta hai zinda rahne ki hasrat gai nahin
mar ke bhi sans lene ki aadat gai nahin
shayad ki rach gai hai hamare KHamir mein
sau bar sulh par bhi adawat gai nahin
aana paDa palaT ke hudud o quyud mein
chhoDi bahut thi phir bhi sharafat gai nahin
rahti hai sath sath koi KHush-gawar yaad
tujh se bichhaD ke teri rifaqat gai nahin
baqi hai reze reze mein ek irtibaat sa
yasir bikhar ke bhi meri wahdat gai nahin
Ghazal
Lagta hai zinda rahne ki hasrat gai nahin
Khalid Iqbal Yasir