lab-e-KHirad se yahi bar bar niklega
nikalne hi se dil ka ghubar niklega
ugenge phul KHayalon ke reg-zaron se
KHizan ke ghar se julus-e-bahaar niklega
kahin fareb na khana yahi fida-e-jam
ba-waqt-e-kar ajab hoshyar niklega
chaman ka husn samajh kar sameT lae the
kise KHabar thi ki har phul KHar niklega
ye hukm hai ki koi rah-e-rast par na chale
hawa ke ghoDe pe koi sawar niklega
kise nahin hai shikayat 'raza' zamane se
TaTolo koi jigar dagh-dar niklega
Ghazal
Lab-e-KHirad se yahi bar bar niklega
Kalidas Gupta Raza