lakh mujhe dosh pe sar chahiye
sail-e-bala ko mera ghar chahiye
zad-e-safar se kahin kaTti hai rah
dil mein faqat shauq-e-safar chahiye
KHair ho tabani-e-KHurshid ki
shab ke dularon ko sahar chahiye
ab ye talab hai ki hawas chhoDiye
peD nahin mujh ko samar chahiye
mangte hain wo bhi zamin se murad
su-e-falak jin ki nazar chahiye
ab unhen sahil na Dubo de jinhen
par utarne ko bhanwar chahiye
mujh ko to hai KHana-KHarabi pasand
aap kahen kis liye ghar chahiye
mujh sa bhi mear-talab kaun hai
dukh bhi mujhe koi amar chahiye
kuchh nahin aata to KHushamad hi sikh
hath mein koi to hunar chahiye
puchh to lun rahzan-e-waqt se
meri kala ya mera sar chahiye
tegh ki 'rashid' thi zarurat mujhe
main ye samajhta tha sipar chahiye
Ghazal
Lakh mujhe dosh pe sar chahiye
Rashid Mufti