Kyun karte ho etibar mera

kyun karte ho e'tibar mera
malum hai tum ko pyar mera

ye KHair hai aaj kuchh to kahiye
kyun zikr hai bar bar mera

ek baat mein faisla hai tum se
ranjida hai dil hazar mera

tera nahin e'tibar mujh ko
tu bhi na kar e'tibar mera

shayad ki na ho tum apne bas ke
dil par to hai iKHtiyar mera

mujh ko na ho rashk ghair-mumkin
tu aur ho dost-dar mera

kuchh samjhe hue hain apne dil mein
sunte nahin haal-e-zar mera

wo hae bigaD ke us ka jaana
rona wahin zar-zar mera

kal tak to 'nizam' ye na tha haal
dil aaj hai be-qarar mera