kyun aankh se surKHi ab chhalki hui lagti hai
ye nind ki rani bhi ruThi hui lagti hai
yaadon ka tasalsul hai ghanghor judai hai
sawan ki tarah ye bhi chhai hui lagti hai
sujhe na mudawa kyun KHud mere masiha ko
zaKHmon ki tarah chahat risti hui lagti hai
aawaz ye kis ne di phir yaad ye kaun aaya
be-tabi-e-dil kuchh kuchh sambhali hui lagti hai
guzri hai gulabon ko daman mein KHizan bhar ke
har shaKH-e-chaman lekin mahki hui lagti hai
bazar-e-mohabbat ke tajir hain sitam-pesha
ai 'bano' teri qimat lagti hui lagti hai
Ghazal
Kyun aankh se surKHi ab chhalki hui lagti hai
Saima Naseem bano