kya kisi ki talab nahin hoti
shairi be-sabab nahin hoti
jaane kis dhun mein bhage jate hain
justuju ji mein kab nahin hoti
ba-adab dushmani ko kya roen
dosti ba-adab nahin hoti
chand us waqt bhi to hota hai
jab kisi ghar mein shab nahin hoti
hum ne duniya mein kya nahin dekha
hashr ki fikr ab nahin hoti
mai-kade mein bhi kuchh na kuchh to hai
bhiD yun hi ghazab nahin hoti
kaun sachcha hai kaun jhuTa hai
ye jirah hum se ab nahin hoti
Ghazal
Kya kisi ki talab nahin hoti
Dinesh Thakur