Kya karun ranj gawara na KHushi ras mujhe

kya karun ranj gawara na KHushi ras mujhe
jine degi na meri shiddat-e-ehsas mujhe

main kisi bazm ke qabil na raha tere baad
hans paDa hun to hua jurm ka ehsas mujhe

hum ne ek dusre ko pursa-e-furqat na diya
meri KHatir thi tujhe aur tera pas mujhe

ek Thahra hua dariya hai meri aankhon mein
jaane kis ghaT pe maregi teri pyas mujhe

jaise pahlu-e-tarab mein koi nashtar rakh de
aaj tak yaad hai teri nigah-e-yas mujhe

reza reza hua jata hai mera sang-e-wajud
yun sada de na pas-e-parda-e-anfas mujhe

shaKH se barg-e-chakida ka taqaza jaise
kuchh isi tarah abhi tak hai teri aas mujhe

ruh ke dasht mein ek hu ka saman hai ai 'shaz'
de gaya kaun bhare shahr mein ban-bas mujhe