Kya hai ki aaj chalte ho katra ke rah se

kya hai ki aaj chalte ho katra ke rah se
dekho idhar nigah mila kar nigah se

sharm-e-jafa se chhupte ho tum dad-KHwah se
uzr-e-gunah tumhaara hai bad-tar gunah se

un ki haya o sharm ne rakkhi hai dil ki sharm
kya hoga jab nigah milegi nigah se

insaf bhi yahi hai yahi shan-e-husn bhi
han han nazar churao qatil-e-nigah se

baitus-sanam se dur nahin hai haram ki rah
kyun rah puchhen zahid-e-gum-karda-rah se

kyun shikwa hum karen adam-e-iltifat ka
wo puchhte to hain nigah-e-gah-gah se

zahid hazar haif ki pahuncha na koi faiz
rindon ke mai-kade ko teri KHanqah se

parwanon ka hujum hai shama-e-jamal par
jita phirega kaun teri jalwa-gah se

shikwa karun tumhaari jafa ka to ru-siyah
dekho na tum mujhe nigah-e-uzr-KHwah se

KHushhaali-e-raqib se wo shad shad hain
yani hain be-KHabar mere haal-e-tabah se

gardan jhuki hui hai uThate nahin hain sar
Dar hai unhen nigah laDegi nigah se

nikla na koi haif yahan qabil-e-shikar
sayyaad KHali hath phira said-gah se

har chand 'wahshat' apni ghazal thi giri hui
mahfil suKHan ki gunj uThi wah wah se