kuza-e-dard mein KHushiyon ke samundar rakh de
apne honTon ko mere zaKHm ke upar rakh de
itni wahshat hai ki sine mein ulajhta hai ye dil
ai shab-e-gham tu mere sine pe patthar rakh de
sochta kya hai use bhi mere sine mein utar
tujh se ye ho nahin sakta hai to KHanjar rakh de
phir koi mujh ko meri qaid se aazad kare
mere andar se mujhe khinch ke bahar rakh de
jal raha hai jo mere KHana-e-jaan ke andar
is diye ko bhi koi taq-e-hawa par rakh de
ai saba de tu mere soKHta-jaanon ko KHiraj
un ki turbat pe hi kuchh barg-e-gul-e-tar rakh de
murda ahraf bhi karte hain takallum 'shahid'
apna kuchh KHun-e-jigar lafz ke andar rakh de
Ghazal
Kuza-e-dard mein KHushiyon ke samundar rakh de
Shahid Kamal