Kufr-e-ishq aaya badal mujh momin-e-din-dar tak

kufr-e-ishq aaya badal mujh momin-e-din-dar tak
naubat-e-ba-sandal-o-qashqa hai bal zunnar tak

ashT ka ashlok ek rahib ne but-KHane ke bich
mujh ko batlaya ki bhula ghair zikr-azkar tak

shoabada duniya ka kam fursat bahut hai jun hubab
zindagi hai ta-zamana wada-e-iqrar tak

kaam hai matlab se chahe kufr howe ya ki din
ja pahunchta hai kisi surat se apne yar tak

'afridi' chhoD mat hargiz dar-e-pir-e-mughan
hath aawe duKHtar-e-raz saghar-e-sarshaar tak