kuchh yaadgar-e-shahr-e-sitamgar hi le chalen
aae hain is gali mein to patthar hi le chalen
yun kis tarah kaTega kaDi dhup ka safar
sar par KHayal-e-yar ki chadar hi le chalen
ranj-e-safar ki koi nishani to pas ho
thoDi si KHak-e-kucha-e-dilbar hi le chalen
ye kah ke chheDti hai hamein dil-giraftagi
ghabra gae hain aap to bahar hi le chalen
is shahr-e-be-charagh mein jaegi tu kahan
aa ai shab-e-firaq tujhe ghar hi le chalen
Ghazal
Kuchh yaadgar-e-shahr-e-sitamgar hi le chalen
Nasir Kazmi