Kuchh sulagte hue KHwabon ki farawani hai

kuchh sulagte hue KHwabon ki farawani hai
shahr-e-ehsas mein aainda ki tabani hai

saat-e-sham ka darwaza pighal jaega
chashm-e-umnid mein wo shola-e-imkani hai

jism par apne bhi poshak sambhaale rakhiye
sina-e-dasht pe utri shab-e-uryani hai

kab talak TuTti sanson pe sadaen rakhun
halqa-e-zist ki zanjir bhi layani hai

ab kahan ja ke ye zardab nazar Thahregi
dur tak phaili hui sarhad-e-virani hai

lauh-e-be-rang pe to aks-e-KHudi raushan hai
paikar-e-KHak ke chehre pe pareshani hai

tar-ba-tar ho gae haalat ke chehre 'amir'
ahl-e-daman-e-KHirad par baDi hairani hai