Kuchh gham-e-jaanan kuchh gham-e-dauran donon meri zat ke nam

kuchh gham-e-jaanan kuchh gham-e-dauran donon meri zat ke nam
ek ghazal mansub hai us se ek ghazal haalat ke nam

mauj-e-bala diwar-e-shahr pe ab tak jo kuchh likhti rahi
meri kitab-e-zist ko paDhiye darj hain sab sadmat ke nam

girte KHeme jalti tanaben aag ka dariya KHun ki nahr
aise munazzam mansubon ko dun kaise aafat ke nam

us ki gali se maqtal-e-jaan tak masjid se mai-KHane tak
uljhan pyas KHalish tanhai karb-zada lamhat ke nam

sahra zindan tauq salasil aatish zahr aur dar o rasan
kya kya hum ne de rakhe hain aap ke ehsanat ke nam

raushan chehra bhigi zulfen dun kis ko kis par tarjih
ek qasida dhup ka likkhun ek ghazal barsat ke nam

jin ke liye mar mar ke jiye hum kya paya un se 'manzur'
kuchh ruswai kuchh badnami hum ko mili saughat ke nam