koi jadu na fasana na fusun hai yun hai
aashiqi silsila-e-kar-e-junun hai yun hai
tu nahin hai to tere hijr ki wahshat hi sahi
ki ye wahshat hi mere dil ka sukun hai yun hai
kuchh nahin kahna bhi kah deta hai sara ahwal
KHamushi aaina-e-haal-e-darun hai yun hai
jab se dekha hai mohabbat ko adawat karte
tab se honTon pe mere han hai na hun hai yun hai
ab tere sath mera ji nahin lagta sain
tu ne puchha tha nami aankh mein kyun hai yun hai
aaj bhi kal ki tarah der se ghar aaega wo
phir bahane wahi dohraega yun hai yun hai
Ghazal
Koi jadu na fasana na fusun hai yun hai
Rehana Roohi