koi ada to mohabbat mein pai jati hai
ki jis pe jaan ki bazi lagai jati hai
sitam mein un ke kami aaj bhi nahin koi
magar ada mein hamiyyat si pai jati hai
jo sans lene se bhi dil mein dikhti rahti hai
wo choT aur bhi zid se dikhai jati hai
sitam kiya ki karam us ne mujh pe kuchh bhi sahi
zaban pe baat azizon ki lai jati hai
uTha chuki hai tabiat jo bandagi ke maze
kisi ke jaur se wo baz aai jati hai
ye puchhte jo jahan-afrin kahin milta
tere jahan mein rahat bhi pai jati hai
taDap rahe ho batao 'jigar' kahan hai choT
kahin tabiat se haalat chhupai jati hai
Ghazal
Koi ada to mohabbat mein pai jati hai
Jigar Barelvi