kisi ko dekhte kyun aah rote
jo bas chalta to hum paida na hote
wo ashk ai dard-e-dil aankhon mein hote
jo dagh-e-masiyat daman se dhote
sahar hone ko aai rote rote
kahin wo aastan milta to sote
jhuki jati hain aankhen bar-e-gham se
kisi aaghosh mein sar rakh ke sote
nazar dekha kiye un ki hamesha
yahi hasrat rahi hum jaan khote
'jigar' hum hain to KHaliq bhi hai koi
na hota kuchh agar hum hi na hote
Ghazal
Kisi ko dekhte kyun aah rote
Jigar Barelvi