kisi ki jab se jafaon ka silsila na raha
dil-e-hazin mein mohabbat ka hausla na raha
dayar-e-husn mein milti nahin hai jins-e-wafa
dil-e-gharib ka ab un se wasta na raha
hawa-e-yas ne sham-e-umid gul kar di
kisi se ab koi shikwa bhi barmala na raha
meri nazar ka taqaza bhala wo kya samjhen
ki husn-o-ishq mein pahla sa rabta na raha
ujaD gaya hai kuchh is tarah ab dayar-e-wafa
kahin bhi meri tamanna ka naqsh-e-pa na raha
KHudi na ho saki minnat-kash-e-nashat-e-wafa
hamara hath kabhi mail-e-dua na raha
'kalim' kaun musibat mein kis ka hota hai
dayar-e-dost mein koi bhi aashna na raha
Ghazal
Kisi ki jab se jafaon ka silsila na raha
Kaleem Sahasrami