kisi ke KHwab se baqi na bedari se qaem hai
jahan-e-dard bas meri ada-kari se qaem hai
zaban se kuchh nahin kahte so dil ko haul aata hai
ki ye shahr-e-hawas kis ki dil-azari se qaem hai
jahan mein be-hunar logon ko koi kaise samjhae
ki ye duniya abhi tak kar-e-be-kari se qaem hai
KHizan ke git to hum log kab se gate aae hain
fana ka KHauf phir kis ki jahan-dari se qaem hai
ruKH-e-mahtab se kuchh bhi ayan hota rahe lekin
ye karobar-e-duniya sirf ayyari se qaem hai
Ghazal
Kisi ke KHwab se baqi na bedari se qaem hai
Mahtab Haider Naqvi