kis tarah chubhte hue KHar se KHushbu aae
phul hon lafz to izhaar se KHushbu aae
nanhe ghunchon se khila rahta hai aangan dil ka
yun mahakti hun ki ghar-bar se KHushbu aae
gardish-e-waqt ki tariki se Darna kaisa
sath ho wo to shab-e-tar se KHushbu aae
jazba-e-dil mein jo sachchai ki dhaDkan ubhre
ishq loban bane pyar se KHushbu aae
bas wahi log mohabbat ke hain qabil 'mina'
jin ke aamal se kirdar ki KHushbu aae
Ghazal
Kis tarah chubhte hue Khaar se KHushbu aae
Meena Naqvi