kis shor-e-jahannum mein faza Dub chali hai
dil dhaDke hai sine mein nawa Dub chali hai
wo KHun ki maujen hain har ek su ki kamar tak
farKHanda jamalon ki qaba Dub chali hai
wo habs ka aalam hai ki har sans hai ghayal
kya zikr hua nabz-e-hawa Dub chali hai
kya jaaniye kis goshe se umDi hai siyahi
kya kahiye ki kirnon ki rida Dub chali hai
is shor mein kya koi sunega meri aawaz
jis shor mein matam ki sada Dub chali hai
Ghazal
Kis shor-e-jahannum mein faza Dub chali hai
Khurshid-ul-islam