kin aawazon ka sannaTa mujh mein hai
jo kuchh bhi tujh mein hai ya mujh mein hai
teri aankhen meri aankhen lagti hain
soch raha hun kaun ye tujh sa mujh mein hai
har mausam ne tere dar par dastak di
aaKHiri dastak dene wala mujh mein hai
dil ki miTTi lahu bana kar chhoDega
ye jo kanch ka chalta TukDa mujh mein hai
jis dariya ka ek kinara wo aankhen
us dariya ka ek kinara mujh mein hai
khilta hai wo phul abhi ek khiDki mein
jis ko aaKHir-kar mahakna mujh mein hai
jin aankhon ki jhilen kanwal khilati hain
rang sunahra un jhilon ka mujh mein hai
Ghazal
Kin aawazon ka sannaTa mujh mein hai
Ayub Khawar