KHub naseh ki nasihat ka natija nikla

KHub naseh ki nasihat ka natija nikla
hum ne ashkon ko sambhaala to kaleja nikla

tere rindon ko jalati rahi sahraon ki dhup
kitna be-faiz teri zulfon ka saya nikla

id ka chand jo dekha to tamanna lipTi
un se taqrib-e-mulaqat ka rishta nikla

haif ki phul hain muhtaj-e-nasim-o-shabnam
marhaba chir ke patthar ko jo sabza nikla

aahaT aahaT pe guman guzre hai wo aa pahunche
dil-e-nadan ke bahalne ka tariqa nikla

daman-e-dost ne boson se nawaza 'rahmat'
mujh se behtar mere ashkon ka nasiba nikla