KHushk lamhat ke dariya mein baha de mujhko

KHushk lamhat ke dariya mein baha de mujh ko
marg-e-ehsas ki suli pe chaDha de mujh ko

kaun aa kar tere insaf ka misdaq bane
be-gunahi pe agar tu na saza de mujh ko

ek pal mein ye mera rang uDa dete hain
ras aate nahin KHush-rang libaade mujh ko

yun mujhe dekh ke chehra na chhupa hathon se
main tera jism-e-barahna hun qaba de mujh ko

na mili kucha-o-bazar mein DhunDe se kahin
jo nazar naqsh-ba-diwar bana de mujh ko

tu hayula jo nahin hai to mere samne aa
gumbad-e-dard mein chhup kar na sada de mujh ko