KHushbu hai shararat hai rangin jawani hai

KHushbu hai shararat hai rangin jawani hai
yaadon ke paristan mein shishe ki kahani hai

mazi ki haqiqat hai is daur mein afsana
sita bhi kahani hai mariyam bhi kahani hai

dushman se KHatar walo lamhon pe nazar rakhna
har lamha-e-hasti bhi talwar ka pani hai

honTon ka mahak uThna aanchal ka Dhalak jaana
in pak gunahon ki tariKH purani hai

is shoKH ke matawalo rag rag se lahu mango
patthar pe gham-e-dil ki taswir banani hai

barsat mein bhiga hai doshiza badan us ka
naseh ko bhi bulwa lo ab aag mein pani hai

tariKH-e-badayun mein maruf suKHan-war hain
'saifi' ki nazar lekin girwida-e-'fani' hai