KHush-nazar kah ke Tal de mujhko

KHush-nazar kah ke Tal de mujh ko
ya phir apni misal de mujh ko

KHush-bayani ka shukriya lekin
jurat-e-arz-e-haal de mujh ko

tu bhi ho jae ham-KHayal mera
koi aisa KHayal de mujh ko

ahd-e-hazir to naqsh-e-mazi hai
ab nae mah-o-sal de mujh ko

nazar aati nahin hai rah-e-farar
daere se nikal de mujh ko

tu hai kya KHud ko jaanta hun main
koi uncha sawal de mujh ko