khula hai jhuT ka bazar aao sach bolen
na ho bala se KHaridar aao sach bolen
sukut chhaya hai insaniyat ki qadron par
yahi hai mauqa-e-izhaar aao sach bolen
hamein gawah banaya hai waqt ne apna
ba-nam-e-azmat-e-kirdar aao sach bolen
suna hai waqt ka hakim baDa hi munsif hai
pukar kar sar-e-darbar aao sach bolen
tamam shahr mein kya ek bhi nahin mansur
kahenge kya rasan-o-dar aao sach bolen
baja ki KHu-e-wafa ek bhi hasin mein nahin
kahan ke hum bhi wafadar aao sach bolen
jo wasf hum mein nahin kyun karen kisi mein talash
agar zamir hai bedar aao sach bolen
chhupae se kahin chhupte hain dagh chehre ke
nazar hai aaina-bardar aao sach bolen
'qatil' jin pe sada pattharon ko pyar aaya
kidhar gae wo gunahgar aao sach bolen
Ghazal
Khula hai jhuT ka bazar aao sach bolen
Qateel Shifai