KHud mein jhanka to ajab manzar nazar aaya mujhe
apne andar bhi ajaib ghar nazar aaya mujhe
mujh se us ka ham-safar banna bhi kab dekha gaya
wo bhi apni rah ka patthar nazar aaya mujhe
hadson ne us ke panw se bhi dharti khinch li
wo bhi sail-e-waqt ki zad par nazar aaya mujhe
mehrban koi sharik-e-qaid-e-tanhai na tha
apne zanu par hi apna sar nazar aaya mujhe
dil se thi ummid KHwahish ke safar par sath de
par ye shahin bhi shikasta-par nazar aaya mujhe
ek ek lamhe ne sau sau shoabde dikhlae hain
sach to ye hai waqt jadugar nazar aaya mujhe
itni himmat bhi na thi baDh kar bula leta 'riyaz'
yun to wo bazar mein akasr nazar aaya mujhe
Ghazal
KHud mein jhanka to ajab manzar nazar aaya mujhe
Riaz Majeed