KHiraman shahid-e-simin badan hai

KHiraman shahid-e-simin badan hai
qayamat aasmani pairahan hai

tabassum hai ki mauj-e-nur-o-nikhat
nazar hai ya mohabbat ki kiran hai

meri masti ka andaza hai kis ko
nigah-e-naz meri ham-suKHan hai

wo meri zindagi par hukmaran hain
mere bas mein na ye tan hai na man hai

hazaron rang hain meri nazar mein
tasawwur mein kisi ki anjuman hai

KHayalon mein mere lahra rahi hain
wo zulfen jin mein bu-e-yasaman hai

abhi is mein KHizan aane na pae
ye nau-ras aarzuon ka chaman hai

kahan ab wo mazaq-e-sarfaroshi
zaban par qissa-e-dar-o-rasan hai

nahin badle tere 'muztar' ke andaz
wahi masti wahi diwana-pan hai