khiDkiyan khol ke kaisi ye sadaen aain
yaad ye kis ki dilane ko sadaen aain
zehn ki dhund ne umron ko sawali rakkha
dhund ke parde se kitni hi shuaen aain
toD kar kaun si zanjir ye mujrim aae
jurm tha kaun sa un ka jo sazaen aain
main tujhe bhul ke duniya se lipaT jata hun
aisa karne se na jine ki adaen aain
jab kabhi KHwab jaziron pe bulaya mujh ko
KHair-maqdam ko mere nur fazaen aain
nam ek dil mein dhaDakta hai sahifa ban kar
is sahife ki hifazat ko hawaen aain
Ghazal
KhiDkiyan khol ke kaisi ye sadaen aain
Azeez Prihar