KHak ya kahkashan se uThta hai
dard aaKHir kahan se uThta hai
hai ajab ja-e-amn qarya-e-dil
hashr sara jahan se uThta hai
dekh ai aah-e-sakinan-e-zamin
ek ghubar aasman se uThta hai
pahle ye KHar-o-KHas jalata tha
shoala ab gulsitan se uThta hai
masala KHatir-e-pareshan ka
KHwahish-e-raegan se uThta hai
ek KHala hai jo pur nahin hota
jab koi darmiyan se uThta hai
shahkar-e-suKHan hai misra-e-'mir'
kab ye tujh na-tawan se uThta hai
Ghazal
KHak ya kahkashan se uThta hai
Syed Amin Ashraf