Kami na ki tere wahshi ne KHak uDane mein

kami na ki tere wahshi ne KHak uDane mein
junun ka nam uchhalta raha zamane mein

'firaq' dauD gai ruh si zamane mein
kahan ka dard bhara tha mere fasane mein

junun se bhul hui dil pe choT khane mein
'firaq' der abhi thi bahaar aane mein

wo koi rang hai jo uD na jae ai gul-e-tar
wo koi bo hai jo ruswa na ho zamane mein

wo aastin hai koi jo lahu na de nikle
wo koi hasan hai jhijhke jo rang lane mein

ye gul khile hain ki choTen jigar ki ubhri hain
nihan bahaar thi bulbul tere tarane mein

byan shama hai hasil yahi hai jalne ka
fana ki kaifiyaten dekh jhilmilane mein

kasi ki haalat-e-dil sun ke uTh gain aankhen
ki jaan paD gai hasrat bhare fasane mein

usi ki sharh hai ye uThte dard ka aalam
jo dastan thi nihan tere aankh uThane mein

wo koi rang hai jo uD na jae ai gul-e-tar
wo koi bu hai jo ruswa na ho zamane mein

bayan-e-shama hai hasil yahi hai jalne ka
fana ki kaifiyaten dekh jhilmilane mein

gharaz ki kaT diye zindagi ke din ai dost
wo teri yaad mein hon ya tujhe bhulane mein

hamin hain gul hamin bulbul hamin hawa-e-chaman
'firaq' KHwab ye dekha hai qaid-KHane mein