kaise niklun KHumar se bahar
bazuon ke hisar se bahar
dard nikla hai sabr ki had se
ashk nikle qatar se bahar
chand lamhon ki muKHtasar qurbat
aur yaaden shumar se bahar
is liye us ki yaad mein gum hun
bhulna iKHtiyar se bahar
aur jaen kahan mah o anjum
roz-o-shab ke madar se bahar
tifl-e-dil phir udas baiTha hai
koi le jae pyar se bahar
koi 'raKHshanda' milne aaya hai
chal chalen intizar se bahar
Ghazal
Kaise niklun KHumar se bahar
Rakhshanda Naved