Kahte ho na denge hum dil agar paDa paya

kahte ho na denge hum dil agar paDa paya
dil kahan ki gum kije hum ne muddaa paya

you say you will not give my heart, if you find it around
where do I have a heart to lose, my fate, for I have found

ishq se tabiat ne zist ka maza paya
dard ki dawa pai dard-e-be-dawa paya

my being did, from love's domain, the joy of life procure
obtained such cure for life's travails, which itself had no cure

dost-dar-e-dushman hai e'timad-e-dil malum
aah be-asar dekhi nala na-rasa paya

to my beloved enemy, my heart chose to defect
my cries remain without relief, my sighs without effect

sadgi o purkari be-KHudi o hushyari
husn ko taghaful mein jurat-azma paya

their guile mixed with naivete, stupor with vigilance
beauty, in apathy, is found, to test their beau's essence

ghuncha phir laga khilne aaj hum ne apna dil
KHun kiya hua dekha gum kiya hua paya

the bud, again, began to bloom, today my heart I see
that was long lost has now been found, bloodied to such degree

haal-e-dil nahin malum lekin is qadar yani
hum ne bar-ha DhunDa tum ne bar-ha paya

I know not where my heart may be, but this much comes to mind
that every time we searched for it, you were the one to find

shor-e-pand-e-naseh ne zaKHm par namak chhiDka
aap se koi puchhe tum ne kya maza paya

the preacher's noisy remonstrance, salt on my wound did strew
someone should go and ask of him "how does this gladden you?"

hai kahan tamanna ka dusra qadam ya rab
hum ne dasht-e-imkan ko ek naqsh-e-pa paya

be-dimagh-e-KHajlat hun rashk-e-imtihan ta-kai
ek bekasi tujh ko aalam-ashna paya

KHak-bazi-e-ummid kar-KHana-e-tifli
yas ko do-alam se lab-ba-KHanda wa paya

kyun na wahshat-e-ghaalib baj-KHwah-e-taskin ho
kushta-e-taghaful ko KHasm-e-KHun-baha paya

fikr-e-nala mein goya halqa hun ze-sar-ta-pa
uzw uzw jun zanjir yak-dil-e-sada paya

shab nazara-parwar tha KHwab mein KHayal us ka
subh mauja-e-gul ko naqsh-e-boriya paya

jis qadar jigar KHun ho kucha dadan-e-gul hai
zaKHm-e-tegh-e-qatil ko turfa dil-kusha paya

hai makin ki pa-dari nam-e-sahib-e-KHana
hum se tere kuche ne naqsh-e-muddaa paya

ne 'asad' jafa-sail ne sitam junun-mail
tujh ko jis qadar DhunDa ulfat-azma paya