kahin husn ka taqaza kahin waqt ke ishaare
na bacha sakenge daman gham-e-zindagi ke mare
shab-e-gham ki tirgi mein meri aah ke sharare
kabhi ban gae hain aansu kabhi ban gae hain tare
na KHalish rahi wo mujh mein na kashish rahi wo mujh mein
jise zoam-e-ashiqi ho wahi ab tujhe pukare
jinhen ho saka na hasil kabhi kaif-e-qurb-e-manzil
wahi do-qadam hain mujh ko teri justuju se pyare
main 'shakil' un ka ho kar bhi na pa saka hun un ko
meri tarah zindagi mein koi jit kar na haare
Ghazal
Kahin husn ka taqaza kahin waqt ke ishaare
Shakeel Badayuni