Kahin charcha hamara ho na jae

kahin charcha hamara ho na jae
mohabbat aashkara ho na jae

kahin us ka nazara ho na jae
ye dil qurban hamara ho na jae

na dekho tirchhi nazron se KHudara
mera dil para para ho na jae

na paD jaen jigar ke apne lale
kahin us ka ishaara ho na jae

na dekho pyar ki nazron se Dar hai
hamara dil tumhaara ho na jae

fida dil zulf-e-shab-gun par tumhaari
kahin aafat ka mara ho na jae

tumhein dil de to de 'taban' ye Dar hai
hamesha ko tumhaara ho na jae