Kaha ye kis ne ki wade ka etibar na tha

kaha ye kis ne ki wade ka e'tibar na tha
wo aur baat thi jis se mujhe qarar na tha

shab-e-visal wo kis naz se ye kahte hain
hamare hijr mein sach-much tujhe qarar na tha

baghaarta hai jo ab shaiKH zohd ki baaten
to kya ye ahd-e-jawani mein baada-KHwar na tha

faqat thi ek KHamoshi mere suKHan ka jawab
nahin nahin tujhe kahna hazar bar na tha

ye mujh ko dekhte hi tu ne kyun churai aankh
nigah-e-lutf ka kya main ummid-war na tha

wahi thin aish ki raaten wahi the lutf ke din
kisi ki yaad kisi ka jab intizar na tha

hazar shukr ki nikla wo sadiqul-iqarar
tumhein 'hafiz' ki baaton ka e'tibar na tha