kabhi jhiDki se kabhi pyar se samjhate rahe
hum gai raat pe dil ko liye bahlate rahe
apne aKHlaq ki shohrat ne ajab din dikhlae
wo bhi aate rahe ahbab bhi sath aate rahe
hum ne to luT ke mohabbat ki riwayat rakh li
un se to pochhiye wo kis liye pachhtate rahe
us ke to nam se wabasta hai kaliyon ka gudaz
aansuo tum se to patthar bhi pighal jate rahe
yun to na-ahlon ke pine pe jigar kaTta tha
hum bhi paimane ko paimane se Takraate rahe
un ki ye waz-e-qadimana bhi allah allah!
pahle ehsan kiya baad ko sharmate rahe
yun kise milti hai mamul se fursat lekin
hum to is lutf-e-gham-e-yar se bhi jate rahe
Ghazal
Kabhi jhiDki se kabhi pyar se samjhate rahe
Mustafa Zaidi